مراقبے کے جب کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دے گا۔

Meditation یعنی مراقبہ جہاں ازل سے روحانیت کی ترقی اور مشکلات کے حل کا علاج رہا ہے وہاں جدید سائنس نے اسے امراض کا یقینی علاج بھی قرار دیا ہے۔
ہزاروں تجربات کے بعد عبقری کے قارئین کے لئے مراقبے سے علاج پیش خدمت ہے۔ سوتے وقت اگر با وضو اور پاک سوئیں تو سب سے بہتر ورنہ کسی بھی حالت میں صرف 10 منٹ بستر پر بیٹھ کر بلا تعداد ورد کر یں‘ اول و آخر 3 بار درود شریف پڑھیں پھر لیٹ جائیں۔ جس مرض کا خاتمہ یا الجھن کا حل چاہتے ہوں اس کو ذہن میں رکھ کر یہ تصور کریں کہ ’’ آسمان سے سنہرے رنگ کی روشنی میرے سر سے سارے جسم میں داخل ہو کر اس مرض کو ختم یا الجھن کو حل کر رہی ہے اور اس وظیفے کی برکت سے میں سو فیصداس پریشانی سے نکل گیا/گئی ہوں‘‘ یہاں تک کہ اس تصور کو دہراتے دہراتے نیند آجائے۔ شروع میں تصور بناتے ہوئے آپکو مشکل ہو گی لیکن بعد میں آپ پر جب اسکے کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دیگا۔ مراقبے کے بعد اپنی کیفیات فوائد اور انوکھے تجربات ہمیں لکھنا نہ بھولیں۔
مراقبہ سے فیض پانے والے:محترم حضرت حکیم صاحب السلام علیکم! مجھے عبقری رسالہ پڑھتے ہوئے تقریباً پانچ سال ہوچکے ہیں‘ مجھے مراقبہ کا شروع سے بہت شوق تھا‘ جب میں نے عبقری میں ماہوار آنے والا مراقبہ سے علاج پڑھنا شروع کیا تو میرا شوق اور بڑھااور میں نے گھر میں مراقبہ کرنا شروع کردیا۔ آج سے کوئی تقریباً دس گیارہ ماہ پہلے مراقبے کے ذریعے خواب میں آقا مدنی صلی ﷺ کی زیارت مبارک ہوئی۔ دوران مراقبہ میں دیکھتا ہوں کہ آقا حضورنبی کریم ﷺ تشریف فرما ہیں اور آپ ﷺ کے ساتھ حضرت عمر فاروق رضی اللہ عنہ بھی ہیں۔ اتنے میں ایک سائل اندر آیا اور آپ ﷺ سے کچھ عرض کی تو آپ ﷺ میری طرف متوجہ ہوکر فرمانے لگے کہ اگر تمہارے پاس کچھ پیسے ہیں تو دے دو۔ میں نے عرض کی میری جیب تو خالی ہے، میرے پاس تو کچھ نہیں ہے۔ 
اس دوران جب میں نے اپنی جیب میں ہاتھ ڈالا تو کچھ سکے نکلے جو میں نے آپ ﷺ کی خدمت اقدس میں دئیے۔ اس پر آپ ﷺ نے فرمایا کہ اپنے پاس رکھو، کام ہوگیا ہے۔ اس پر میں نے عرض کی آپ ﷺ ان سکوں کو ہاتھ لگائیں یا کچھ دم وغیرہ برکت کیلئے فرمادیں۔ پھر آپ ﷺ نے سکے لے کر ان پر کچھ پڑھنا شروع کردیا، اس دوران حضرت عمرفاروق رضی اللہ عنہ مجھ سے فرمایا کہ مجھے بھی دو میں بھی پڑھ کر دم کرتا ہوں۔ آپ ﷺ اور حضرت عمر فاروق رضی اللہ عنہ نے سکوں پر دم وغیرہ فرماکر مجھے دیے میں نے لے لئے ہیں۔ اس کے بعد آپ ﷺ کے چہرہ انور کی طرف دیکھا اتنا خوبصورت اور حسین چہرہ تھا کہ کچھ بتا نہیں سکتا۔ چہرہ مبارک پرنور کی برسات تھی ، دیکھنے کے دوران چہرہ مبارک کا حسن بڑھ رہا تھا۔ تھوڑی دیر دیکھا پھر آنکھ کھل گئی۔ (ن)